Cun la scumenciadiva "Südtirol ressanea - cunsëies per frabiché y ressané" sustën la Provinzia de Südtirol i patrons y la patrones a mantenì i frabicac che ie bele, a miuré energeticamënter y a fé unì adatei tl daunì.
Truepa jënt ulëssa ressané, fé su o nuzé miec si cësa, si luech o n frabicat che ie bele. Suvënz se fejen truepa dumandes: Ulà scumënci pa? Ce pruvedimënc joa pa? Ce sustënies iel pa? Ciuna soluzion passenëssa pa pra si frabicat? Propi tlo juda inant la cunsulënzes debant y a bonmarcià per l'energia y l ressanamënt.
La cunsulënzes ie ndependëntes, da ntënder y che reverda l frabicat nteressà. Les pieta urientamënt, mostra su pusciblteies cuncretes y juda a tò dezijions cun fundamënt.
L ie a despusizion trëi cunsulënzes
- Na prima cunsulënza debant | 1/2 ëura | tres telefon o online
La cunsulënza de scumenciamënt debant pieta n urientamënt n con' dl cunsum de energia, dla pusciblteies de sparani, di sistems de sciaudamënt, di sustënies y di proscimi vares che n possa fé. - Cunsulënza energetica | 3 ëures | sul post | 150 Euro
Pra la cunsulënza per l'energia vën sul post persones spezialisedes. Les mostra su pusciblteies cuncretes per miuré y nfurmea n con' dl frabiché sustenibl, dl ressanamënt energetich, di cuntribuc y dla detrazions dla chëutes. - Cunsulënza de ressanamënt | 15 ëures | sul post | 500 Euro
La cunsulënza de ressanamënt ie per duc chëi che ulëssa mantenì, cumedé su o svilupé inant n frabicat. L vën analisà la cundizions de costruzion, funziunela y energetica dl frabicat. Ala fin giaperà i zitadins y la zitadines variantes cuncretes de ressanamënt, na valutazion di custimënc, nfurmazions n con' di finanziamënc y cunsëies tleres de co fé.
Per chi ie pa chësta pruposta adateda?
La pruposta ti va a chemuns, firmes y patrons de frabicac residenziei, majons y cëses che ie bele, y a duc i zitadins y la zitadines che uel fé n ressanamënt, n mudamënt o n miuramënt energetich.
Fé al savëi y apusté la cunsulënza śën
Per plu nfurmazions n con' dla ufiertes de cunsulënza y n con' dla puscibltà de se scrì ite: www.klimaland.bz/consulënzes
Nuzëve de chësta pruposta per per svilupé inant vosc frabicat cun na bona cunsulënza te na maniera sustenibla y anjenià per l daunì.
