Cun l ressanamënt energetich dl Sprengl Saniter de Gherdëina uel l chemun de Urtijëi aumenté l’eficienza energetica y l sparani de energia dl fabricat che ie mpue unì ti ani y nscì dé n cuntribut ala diminuzion dla emiscions de CO2. L ie udù dant de ijulé l tët y la muredes, de mudé ora i vedli vieresc, de tò demez i puenc termics y de nstalé njinies per mudé ora l'aria ti locai cun recuper dl ciaut. Cuntroi de qualità rigurëusc ntan i lëures dëssa garantì standard tecnics auc. Daldò uniral fat tesć y cuntroi di mplanc de sciaudamënt y de nsferdé per cuntrulé l’eficienza di mplanc.
I travierc prinzipei de chësc proiet ie:
- Sparani de energia: N uel smendrì l consum de energia dl 80% ncunfront a dant. Aldó di conc energetics vëniel arjont l livel dl “Klimahaus B”
- Diminuzion de emiscions de CO2: L traviert ie de sparanië ntëur ala 30 tones de CO2 al ann.
- Miuré l ijulamënt dl ciaut: Tres l ijulamënt dl tët y dla muredes y l mudé ora di vedli vieresc dëssa l’efficienza termica auzé dl 30%.
- Qualità de aria y comfort: L’instalazion de mplanc de ventilazion dezentrei aumënta la qualità de aria y l comfort de vita de chiche ie ti locai.
Per chësc proiet, che costa ndut 659.325,36 Euro, iel unì damandà n finanziamënt FESR (Fond Europeich per l Svilup Regiunel). L ufize de energia y scunanza dl clima à dat na bona valutazion y l chemun de Urtijëi giapa nscì n finanziamënt dl 80% dla spëises che curespuend a € 511.843,03.
Adum cun chësc proiet vëniel nce instalà n agregat a stom per l local di destudafuech per garantì l strom nce te caji de emergënza.
I lëures à scumencià de lugio y vën fai y coordinei dala firma Malbo de La Val. I lëures va inant debota y ie a n bon pont: L sgondo partimënt y i lëures sul tët ie bele finei, i lëures dl prim partimënt dëssa finé via entro la fin dl mëns.
