La chëuta sun l retlam ie da paië per fé cunëscer comunicazions de retlam te posc publichs o te posc daviërc ala jënt (*) o per comunicazions che n possa audì te chisc posc. Paië la chëuta muessa chël che à l mesum tres chël che n fej retlam. L retlam possa mé uni fat a na moda che l trafich di auti y de chëi che va a pé ne vën nia desturbà y a na moda che i zitadins ne vën nia desturbei. Retlam che desturba la gheneda ie pruibì. Me te caji de ezezion possun fé retlam adaut. Retlam cun l julier possun mé fé ntan manifestazions sportives y tl post ulache ie la manifestazion sportiva.

Per fé retlam muessun fé dumanda tl ufize per l frabiché sun papier da bol da € 16,00 njuntan n desseni a culëures te scala 1:100. Sce la dumanda vën data prò, fej l Ambolt l’autorisazion. Dò che n giata l’autorisazion muessun de jù tl ufize dla chëutes na detlarazion (cëla sota formulares), te chëla che n muessa de sëura la carateristighes, la dureda dl retlam y ulache n fej retlam. Chësta detlarazion ie ënghe da de jù sce n muda un de chisc dati.

Ti caji che vën dò paiun mé 50% dla chëuta: retlam fat da lies, cumitac o autri enc che ne davania nia, per manifestazions politiches, de sindacac, cultureles, sportives o religeuses. Te chisc caji paiun deguna chëuta sun l retlam: - per sperses mëndres de 300 cm²; - per l inuem dla firma scrit su sun la sënta dla firma y mënder de 5m²; - per scrites sun i auti, sce la scrites ie manco de doi iedesc sun l auto y uni scrita ie mëndra de ½ m²; - sce n fej al savëi de fité o vënder n imuvibl tacan su la comunicazion mëndra de ¼ m² sun l imuvibl da fité o da vënder; - per retlam de zaites sce l vën fat tla vedrines o dan la butëighes; - per retlam fat dal stato.

(*) posc publics: stredes, plazes, verzons publics y sperses daviërtes al publich o ulache la jënt passa. Posc daviërc ala jënt: locai y sperses per fé manifestazions publiches, per ustaries, per butëighes o autri, te chëi che n possa mé jì ntan cërta ëures y per fé cër stroc.

Tarifes chëuta sun l retlam