L'ufize dla veles à l duvier de tenì ajurnedes la listes de vela, te chëles che vën scrì ite duc i zitadins che stà tl chemun che ie litadëures.

L ie litadëures duc i zitadins taliani che à cumplì i 18 ani y che n ie nia te una dla cundizions de mpëdimënt ududes dant dala lege. Tla region Trentino – Südtirol muessa i zitadins per pudëi to pert ala veles regioneles y provinzieles y per la vela dl Ambolt y dl cunsëi de chemun avëi la residënza tla region per almanco cater ani alalongia. Per jì a lité dla provinzia de Bulsan muessa i zitadins sté tla region almanco cater ani, de chëi però doi ani dla provinzia de Bulsan. Uni un che ie scrì ite tla listes de vela dl Chemun po cialé ite te chëstes y damandé n zertificat che desmostra l'iscrizion tla medemes.

L numer di cumpëidaujes muda pra uni vela. I secreteres dla sezions de vela vën numinei dai presidënc dla sezions de vela. I presidënc dla sezions de vela vën numinei dala Chëurt de Apel de Trent, che tën nce la lista la persones adatedes a fé presidënt de vela. La lista dla persones che pudëssa fé presidënc de vela vën ajurnà aldò dla comunicazions dl dependënt chemunel nciarià per la veles. Per l'iscrizion te chësta lista muessen fé na domanda aposta entro i 31 de utober de uni ann tl ufize per la veles dl Chemun. I cumpëidaujes vën numinei dal dependënt nciarià per la veles. Chisc vën crì ora dala lista dla persones adatedes, che vën tenì te uni Chemun, y te chëla che uni litadëur cun diplom dla scola mesana pò se lascé scrì ite. La dumanda aposta muessa unida data ju entro i 30 de nuvember de uni ann tl ufize per la veles dl chemun (cëla l formular domanda per l'iscrizion tla lista di cumpëidaujes). L ne po nia deventé cumpëidaujes i dependënc di Ministeri dell'Interno, dla Posta y Telecomunicazions y Trasporc, chëi che fej pert ala Forzes Armedes y ie te servisc, prevesc, munighes, patri, dutores provinziei, secreteres de chemun, i dependënc de chemun che lëura ti ufizies de veles y i candidac ala vela, per chëla che l vën lità.